السلام عليكم
من أول يوم قررت
إني ماتكلمش في السياسة .. ومازلت متمسك بقراري
عشان كده ماكتبتش
الأسبوع اللي فات (حد خد باله أصلاً؟)
المشكلة إن
الأجواء مليئة بالسياسة وصعب الواحد يركز في حاجة تانية! .. بس نحاول!
(فات ربع ساعة ومش
لاقي أفكار برضه)
في فكرة بس محتاجة
دراسة وبحث وروقان جامد .. مش وقتها النهاردة خالص!
الحاجة الوحيدة
اللي بافكر فيها دلوقتي هي مشاهد أفلام الأكشن اللي فيها معارك جامدة وناس بتجري
ورا بعض وقنابل .. بس من غير صوت .. تصوير بطيء .. ناس بتحرك شفايفها من غير صوت
.. ومزيكا هادية حتى لو حزينة!
نفسي في كده .. أنزل
الشارع أو أقعد في الشغل بالإخراج الفني العالي دا!
مزيكا .. وناس بتتكلم
من غير صوت .. ياااااه!
حصل فعلاً أهو! ..
أنا كده فصلت صوت الناس وبيجروا ورا بعض
عالفاضي! .. مزيكا بس! .. أركز أنا بقى!
(بعد ربع ساعة)
طب الأصوات اللي
في دماغي بقى؟! .. دي مش بتسكت!!! .. دي مش عايزة مخرج .. دي لازم نقفل السينما!
.. بس دي شغالة كل الحفلات .. mid night وكمان late
mid night.
الأصوات اللي في
دماغي دي كتير قوي! .. للأسف الأيام دي في تشاؤم كتير .. على طموح كتير .. خلاص
أركز عالطموح .. الطموح حلو .. بس الطموح
قدامه عوائق .. وأنا تعبان .. وزهقان .. طب أسافر .. مش فاضي .. طب الأولاد .. طب
صحابي .. طب قعدة القهوة .. طب السياسة! .. أصوات ... أصوات .. أصوات .. أنا أصلاً
كنت عايز ايه؟
آه .. فكرة مقالة!
أركز بقى!
(بعد عشر دقائق):
وأنا بافكر أكتب
ايه وبافكر في الأصوات ومن باب إن الشيء بالشيء يذكر: أصوات العصافير مزعجة قوي ..
جبت بغبغانين بيجننوني الصبح .. هاتوا حاجة مش بتزقزق أحسن .. السمك مش بيعمل صوت
خالص .. بس ممل قوي برضه ..مابيلعبش معايا وبيموت علطول ومحتاج عناية مهلكة .. ماتجيبوش
عصافير ولا سمك .. ما علينا)
كمية الأفكار اللي
بتلف في نفس اللحظة في راسي مرعبة! .. راسي عاملة زي الغسالة وهي بتتهز! .. أو زي
ماكينة غزل البنات .. الأفكار بتلف بسرعة .. بس مش معايا العصايا اللي أحطها في
الماكينة والأفكار تثبت حواليها .. (ابني بيقوللي كل غزل البنات دا بخمسة جنيه
بس؟! .. ماعرفش ايه اللي محسسه إن الخمسة جنيه هايفة كده على واحد غزل البنات؟!!!)
(بعد عشر دقايق):
مش عارف أركز بسبب
مراتي .. عربيتها مش بتدور وفي مشكلة في البطارية .. حاتجنن مش عارف أفكر .. ليه
العربية بتاعتها بتعطل في الشغل بس؟! .. بتنزل بيها من البيت سليمة .. تعطل في جراج
الشغل .. يدوروها بالعافية .. أما ترجع البيت أخد العربية الاقيها زي الفُل ..
أخدها التوكيل يلاقوها زي الفُل .. تنزل بيها تاني يوم الصبح تلاقيها زي الفُل ..
تيجي ماشية من الشغل ماتدورش في الجراج! .. سبحان الله!
ايه دا؟! .. نسيت
أشرب نسكافيه! .. نقص الكافيين أكيد هو سبب نقص التركيز!
فات نص ساعة
ومافيش تحسن! .. الواحد محتاج يشوف فيلم حلو .. لسه شايف The Flowers
of War امبارح!
فيلم مبهر بشكل مش
طبيعي .. عنيف ودموي للأسف .. بس غير كده فعلاً مبهر كتمثيل وإخراج وتفاصيل ومشاعر
.. مليان أحاسيس ومواجع ومشاعر حلوة قوي عن تقبل الآخرين والتضحية وتقدير الناس!
إمتى بقى حايفتحوا
الآي ماكس في القاهرة الجديدة؟!! .. الموضوع دام معصبني جداً! .. اشمعنى احنا
يعني؟! .. صعب قوي أروح سينما في 6 أكتوبر! .. وبيغيظوني .. كنت عايز أشوف أيرون
مان وفيلم توم كروز اللي فات!
فات ساعة باشوف
الأخبار يمكن الاقي فكرة .. ايه الأخبار دي؟! .. يادي النيلة! .. أجّلوا الدور
التاني من الدوري؟!!! .. طب وبعدين؟! .. مع إني ماتفرجتش على أي ماتش في الدور
الأول!!
طب حد شاف جول
نيمار امبارح؟! .. بيقولوا حاجة فظيعة .. حاروح أشوفه.
بعد ساعة:
أنا أسف جداً ..
مضطر أعتذر عن كتابة مقال الأسبوع دا .. لعدم وجود مخ يعمل كما ينبغي!
20 يونيو 2013
