التنين - الأسطورة

السلام عليكم

الموضوع النهاردة غريب شوية!

بس أصلي كنت باحبه جداً وعارف إن ناس كتير قوي ماتعرفش عنه معلومات كفاية .. أو فاكرينه مجرد ممثل و(بتاع كراتيه)!

بروس لي!

ممثل .. مؤلف .. مخرج .. منتج .. مدرب فنون قتالية .. مخترع فنون قتالية .. فيلسوف .. وشاعر!

الراجل دا أسطورة لم ولن تتكرر

خلونا نشوف ليه 

(وبالمناسبة الكلام اللي في ويكيبديا العربي مختلف عن باقي المواقع وحتى غير الويكيبديا الإنجليزي .. فا سيبكوا منه)

بروس لي صيني مولود في سان فرانسيسكو في 27 نوفمبر 1940. ومات وعنده 33 سنة في 20 يوليو 1973 (باحترم أنا برضه أصحاب الانجازات اللي أصبحوا أساطير في وقت قليل)

الوقت اللي اتولد في في الثقافة الصينية اسمه ساعة التنين .. والسنة اسمها سنة التنين

وعشان كده هو نفسه من ألقابه التنين!

بعد ثلاث شهور من ولادته في سان فرانسيسكو أهله أخدوه وعاشوا في هونج كونج .. وبما إنها كانت مستعمرة بريطانية .. كان هو عنده مشاكل مع الإنجليز ودائم الشجار مع الأطفال الانجليز في المدرسة .. خصوصاً المغرورين منهم.

لحد ما مرة في خناقة أخد علقة تمام .. كان عنده 13 سنة .. (ودي المرة الوحيدة المعروف إنه اتضرب فيها في حياته! وقرر يلعب فنون قتالية)

بدأ وهو عنده 16 سنة يتعلم الفنون القتالية على يد مدرب صيني معروف جداً عامل زي كهنة معابد الكونج فو بتاعة الأفلام اسمه ييب مان 
(http://en.wikipedia.org/wiki/Yip_Man)

وطبعاً تفوق وكان مقاتل مبهر (وحانشوف كمان شوية هو قد ايه مبهر ومختلف من حيث القوة والسرعة)

في عام 1959 اتخانق مع ابن زعيم عصابة كل الناس بيخافوا منها وضربه جامد .. والد بروس خاف عليه .. أعطاه 100 دولار وبعته أمريكا .. سان فرانسيسكو تحديداً .. عشان يخلص من المشاكل ويكمل تعليمه في مكان أفضل من المدارس اللي كان فيها.

الظريف إن بروس لي اللي محترف رقص التشا تشا .. قدر يزود دخله بإعطاء دروس رقص للمسافرين على المركب من الصين لأمريكا!

التمثيل بدأ معاه من وهو طفل رضيع! .. والده الممثل أصلاً كان بيشيله عالمسرح .. وبعدين لما راح أمريكا كان مثل بالفعل في حوالي 20 فيلم كأدوار صغيرة.

دخل بروس الجامعة في سياتل وتخصص في الفلسفة!! وكل المواضيع اللي كتبها في الجامعة كانت عن تأثير الفلسفة والتأمل على حركة الجسم الهادئة والسريعة!

أيام الجامعة كان بيشتغل في المطاعم وبيدي دروس كونج فو .. وكانت حاجة جديدة على أمريكا أيامها .. حتى الكاراتيه ماكانش حد عارفه .. الفن القتالي الآسيوي الوحيد اللي كان معروف في أمريكا ساعتها كان الجودو.

من هنا نلاحظ إن انتشار الفنون القتالية الأسيوية في العالم احتمال كبير ماكنش حصل أصلاً لولا بروس لي اللي أبهر العالم بمستواه وسرعته.

الموضوع كبر مع بروس لي .. والدروس أصبحت مدرسة كبيرة لتعليم الكونج فو "Jun Fan Gung Fu"

Jun Fan  دا اسم بروس لي الأصلي .. و Gung Fu  يعني كونج فو بأحد اللهجات اليابانية.

في المدرسة دي أتعرف على ليندا واتجوزها .. وكان قرر إنه مش حايمثل خلاص وتفرغ للرياضات القتالية.

كفاية بقى معلومات عادية ونشوف الحاجات الجديدة والغريبة؟

بدأ بروس تمثيل تاني عشان حس إن المدرسة كبرت قوي وأصبح غير قادر على تعليم عدد أكبر من الطلبة .. وتعيين مدربين تانيين كتير مش حاييسيب المدرسة بنفس المستوى! (منتهى التفاني والاخلاص لرياضته اللي بيحبها)

بدأ تمثيل مسلسل في أمريكا (Green Hornet) وكانوا المخرجين بيطالبوه إنه يتحرك أبطأ عشان مش عارفين يصوروه!

بروس اخترع رياضات قتالية جديدة مثل Jeet Kune Do وبدأ يعلمها للناس .. ومنهم ممثلين كتير زي ستيف ماكوين .. كريم عبد الجبار .. جيمس جارنر.

بروس لي قام بتأليف ثلاث أفلام .. فشل للأسف في بيعها في أمريكا لأسباب مختلفة .. راح هونج كونج مع ابنه براندون في إجازة .. لاقاهم عارفينه وبينادوه كاتو (اسمه في مسلسل Green Hornet) فقرر يجرب يمثل في هونج كونج.

أول فيلم ليه في هونج كونج كان The Big Boss .. سنة 1971 .. وكان نجاحه ساحق لدرجة إن بروس قرر يستقر في هونج كونج وأستعد لبيع بيته في أمريكا .. ومثل فيلمه التاني The way of the dragon .. (تأليفه وانتاجه واخراجه) .. ولاقى نفس النجاح .. بس المرة دي هوليوود شافوا الفيلم!

بروس لي كان السبب في أول فيلم في التاريخ يكون إنتاجه مشترك بين أمريكا وهونج كونج! .. فيلم اسمه Enter the Dragon .. ودا يوضح مدى قوته وتأثيره .. إن أمريكا تتنازل عن الألاطة وتشارك هونج كونج عشان خاطر عيون بروس لي .. ويوضح كمان وطنية بروس لي اللي ماجريش ورا هوليوود .. وصمم ان يبقى فيه وجود هونج كونجي!

للأسف بروس لي مات قبل افتتاح الفيلم وماشافوش .. قصة بسيطة .. صداع .. قرص مسكن .. إغماء .. غيبوبة .. وفاة! .. في قصص كتير قوي في الموضوع دا اتقالت منها إنها لعنة أصابت عائلته .. عشان كده ابنه مات في شبابه وهو بيمثل فيلم برضه! .. وناس قالوا أرواح صينية شريرة! .. وناس قالوا سم من أعداءه! .. موضوع موته دا عايز مقال لوحده زي كينيدي ومارلين مونرو والفيس بريسلي .. مالوش مجال هنا.

من عجائب الأسطورة المبهرة بقى:

• بروس لي عمره ما أتضرب غير المرة اللي قلنا عليها وعنده 13 سنة!
• بروس لي كسب مسابقة رقص التشا تشا سنة 1958 في هونج كونج كأفضل راقص!
• كسب بطولة ملاكمة سنة 1958 برضه .. بالضربة القاضية طبعاً!
• عشرات المرات سواء في الشارع أو في مواقع التصوير ناس اتحدوه في قتال عشان يتشهروا .. أكتر واحد بروس لي مدحه وقال عليه جامد .. وقال كان سريع جداً .. بروس لي قعد يتفادى الضربات شوية .. الشخص دا ماعرفش يلمسه أصلاً!!! .. وفجأة بروس لي هجم عليه وخبطه في الحيط .. وقعه في الأرض .. شل حركته .. واداله ضربات متتالية في وشه! .. ليه دا كان سريع وقوي وعجب بروس لي؟! .. الله أعلم!
• حصلتله اصابة في ضهره .. ألزمته فراشه ستة شهور .. قضاها في كتابة كتب عن الفنون القتالية .. ورجع تاني وحش برضه!
• كان سعر حصة تعليم الكونج فو معاه في الستينيات 275 دولار في الساعة!!
• كان معروف بخدعة لتوضيح سرعته .. يقوللك تحط عملة في ايدك المفتوحة .. ويقوللك اقفل إيدك .. وأثناء ما بتقفل إيدك يخطفها ويحط عملة مختلفة مكانها قبل ماتقفلها!!!!!
• حتى تشاك نوريس اللي بيعتبر من أعظم أبطال الفنون القتالية في التاريخ بروس لي هو اللي دربه في وقت من الأوقات.
• كان محترف أسلوب اسمه (لكمة البوصة الواحدة) .. وهي انه يبعد ايده عن شخص بوصة واحدة بس .. ومن غير ما يشدها للوراء ولا ياخد عزم للضربة .. بيضرب لكمة مؤلمة جداً .. وأحياناً تدفع اللي قدامه مسافة كبيرة!
• ليو كانج شخصية مورتال كومبات الشهيرة مستوحاة من بروس لي .. نفس الحركات والصيحة المميزة.
• أثناء تصوير فيلم Enter the Dragon.. قام أحد المقاتلين اللي بيصوروا المشاهد الصعبة بتحدي بروس لي مدعياً إن اسلوب بروس لي قديم وهو عنده اسلوب أحسن اسمه "أسلوب النمر" .. بروس لي وافق على التحدي عشان اهانة اسلوبه ضايقته .. وافقه على القتال في موقع التصوير .. بعد 30 ثانية كان المقاتل لازق في الحيط .. مش قادر يتحرك .. يداه مكبلتان .. وشعره مشدود في إيد بروس لي!
• في ركلات في أفلامه قللوا سرعتها في المونتاج عشان خافوا المشاهدين يفتكروها مش حقيقية أو إن المخرج عرضها بسرعة زيادة!!!!
• رغم ان أقصى وزن ليه كان 72 كيلوجرام .. كان بيعمل تمرينات ضغط وعلى ضهره رجل وزنه 113كيلو! .. وكان بيعمل ضغط بيد واحدة باستخدام الإبهام والسبابة فقط!!  http://cs419019.vk.me/v419019248/31c/7YnGlvD4BVA.jpg
• ركلته الجانبية يضرب بها حقيبة تدريب وزنها 140 كيلوا .. تخبط السقف!!

• ليه أشعار كتير!!!!
• كان تدريبه من 7 الى 9 صباحاً جري ولياقة! .. بيجري 6 أميال في 45 دقيقة بتغيير السرعة أكثر من مرة أثناء الركض .. من 11 حتى 12 ظهراً تمرينات أثقال .. بعدين يتمرن بالدراجة .. بعد كده بقى 800 نطة حبل (أنا شخصياً أرهقت) .. وأخيراً يفضل يضرب بيديه 500 ضربة .. في جردلين مليانين صخور مكسرة عشان يقوي احتمال جلده!
• عندما نصحه الطبيب إنه يقلل العنف اللي بيعمله في نفسه قال: "العقل يمكنه قهر ودفع أي شيء .. حتى الألم الحقيقي" !!

للأسف صعب قوي نختصر 33 سنة في صفحتين ..

 بس بروس لي هو الوحيد اللي أثبت ان التنين مش كائن خيالي .. بس كائن أسطوري

وﻻ لسه في حد عايز يجرب يتحداه؟!   ;-)