ساكسفون كلينتون!

السلام عليكم

كنت باتكلم من يومين مع واحد صاحبي عن السفر والسياحة والفُسَح في أوروبا وأمريكا وجاب سيرة المتاحف .. افتكرت متحفين رحتهم قلت أدردش معاكوا عنهم.

الأول كان المتحف المصري  .. المتحف دا طبقاً لويكيبيديا المفروض إنه:

"المتحف المصري بالقاهرة. يحتوي على أكبر مجموعة من آثار مصر القديمة، وإن نافسه المتحف البريطاني واللوفر ومتحف متروبوليتان (نيويورك). ويقبع المتحف المصري بميدان التحرير بقلب القاهرة منذ عام 1906، يحتوي معرض المتحف على 136 ألف أثر فرعوني، بالإضافة إلى مئات الآلاف من الآثار الموجودة في مخازنه."

يعني المفروض إن دا حاجة مافيش زيها في العالم غير اتنين!

أنا للأسف معترف بتقصيري وبإني رُحته مرة واحدة بس أيام الجامعة .. وكنت مضطر كمان! .. صاحبي أنتيمي في فنون جميلة كان رايح يرسم هناك .. وأخدني معاه أسليه! .. قلت بقى أسيبه وأتفرج شوية في المكان الجميل دا.

مانكرش إن في حاجات مبهرة جداً .. خصوصاً إن احنا في المدرسة تقريباً مش بناخد أي حاجة ليها قيمة عن التاريخ فتقريباً مانعرفش في ايه أصلاً في المتحف!

المهم لقيت نماذج طيارات أو طيور جميلة جداً .. بس مرمية بإهمال كده! .. لقيت زي أباجورة من العاج .. لو وضعت بداخلها شمعة تكتشف إن طبقة العاج خفيفة جداً بحيث إن الشمعة لما تضيء تلاقي الأباجورة دي عليها رسوم مرسومة من جوة! .. كانت أفيال لو ذاكرتي ماخانتنيش كالعادة!

الفكرة بقى إن المتحف ضلمة قوي .. وكئيب قوي .. والزجاج اللي بينك وبين المعروضات مِضَلِّم .. وفي حتت بيعكس فيها ضوء الشمس فا ماتشوفش اللي وراه أصلاً.(الكلام دا كان 1995 .. لو دلوقتي أحسن يبقى أنا أعتذر عن المقال وأفرح بالتغيير)

مشكلة تانية إني كل اما أجي أدخل مكان واحد على الباب يقوللي "المكان دا ليه تذاكر مخصوص" .. وأيامها مصروفي ما كفاش أشوف تابوت توت عنخ أمون! .. وتوت عنخ أمون بالذات كان ليه أهمية خاصة عندي لما يثيره من ذهول بسبب الحكايات التي لا تنتهي عن لورد كارنرفون وهوارد كارتر ولعنة الفراعنة وكل الحاجات اللي عرفناها وقرينا عنها ألف مرة .. بالذات في كتب العبقري أنيس منصور.

دا مش معناه إن المتحف مش قيّم .. بالعكس .. دا حاجة مبهرة وعظيمة .. ومدعاة للفخر.

اللي مضايقني حاجة تانية .. وهي إني بعدها بسنة دخلت في أميركا "المتحف القومي للتاريخ الأمريكي"!!!!

المتحف موجود في واشنطن دي سي .. المتحف أفتتح 1964 .. وتم تجديده سنة 2006 بتكلفة 85 مليون دولار! .. ناس بتصرف! .. المتحف قمة في الإبهار والتسلية .. ممتع فعلاً .. أخد مني حوالي نص يوم بحاله!

تذكرة بعشرين دولار (سعر اليوم) تسمحلك بدخول كل حاجة .. 45 قاعة .. أي مؤتمر أو حفلة قائمة .. وتتفرج على كل المعروض!

طيب ايه بقى اللي يضايق في المتحف دا؟!

أقوللك أنا بقى!

اللي يضايق إنك تحس بالمتعة في المتحف دا أكتر من المتحف المصري!

المتحف المصري (زي ما قاللنا ويكي من شوية) "يحتوي معرض المتحف على 136 ألف أثر فرعوني، بالإضافة إلى مئات الآلاف من الآثار الموجودة في مخازنه."

بينما اللي شُفته في المتحف القومي للتاريخ الأمريكي كالتالي (ودا مش هزار – حاتلاقوه موجود في ويكيبيديا برضه):

•  يحتوي الطابق الأول على عدد من الأدوات التي استخدمت في عدد من الأعمال التليفزيونية المسرحية والسينمائية الشهيرة.
• الطابق الثاني يعرض الملابس التي ارتدتها السيدات الأولى في الولايات المتحدة بدءا من مارثا واشنطن حتى لورا بوش.
•  كما يحوي العلم الأمريكي الضخم ذا ال15 نجمة وال15 خطا والذي رفرف فوق قلعة فورت ماكنري خلال حرب 1812 والذي ألهم فرانسيس سكوت كي لكي يكتب "ذو النجوم المتلألئة" وهو النشيد الوطني الأمريكي.
•  يعرض الطابق الثالث متعلقات فريدة تخص الرؤساء الأمريكيين بدءا من بذلة جورج واشنطن العسكرية أثناء حرب الاستقلال الأمريكية، وصولاً إلى ساكسفون بيل كلينتون الخاص!!!!

ملحوظة: دول مش كل المعروضات .. فيه حاجات تانية .. دول مثال بس .. يعني في جزء جميل مثلاً عن تطور وسائل النقل قيّم جداَ

أنا فاكر كمان حائط عليه صور الرؤساء .. ومكان كده فيه عربة من عربات الهنود الحمر زي ما بنسميهم .. أو السكان الأصليين زي ما بيسموهم .. وخيمة وعيّنة أدوات من أدواتهم!

الخلاصة: ليه بقى حاجة كده تبقى مسلية أكتر من المتحف المصري؟ .. ليه مافيش ابتكار وإبهار؟ .. إبهار المعروضات مش كافي .. لازم إبهار حواليهم عن طريق الدعاية والإضاءة ووجود حد يشرح كل حاجة عنهم .. مش عن طريق دليل بيتكلم بزهق .. لازم يبقى متدرب على الابتسام والكلام بشكل استعراضي يلفت النظر ويجذب الانتباه .. لازم اللي يدخل حاجة زي المتحف المصري يخرج راسه بتلف من الذهول ..

الناس هنا بتنبهر بحفلات (بن تن) و(بارني) و(ورلد أون آيس) أكتر من الآثار الفرعونية!

من الأخر .. لازم نحترم آثارنا .. عشان الناس تحترمها .. وتحترمنا!

(هو أنا ليه كل ما باكتب مقال باشعر بالاكتئاب؟!)

محمود فايز

8 مايو 2013