حوار بين طفلين .. قلبلي دماغي

السلام عليكم

النهاردة مش حاقوللك عشان تكون الأول في مجالك تعمل ايه .. بالعكس .. أنا حاقول ليه عندنا مصيبة ومش حايكون في أوائل خالص!

المصيبة للأسف في الأجيال القادمة.

كنت راجع من صلاة الجُمعة ماشي على رجلي .. لقيت قدامي ولاد عندهم عشرة أو حداشر سنة ..

• واحد بيقول للتاني: "وأنت كسبت في اللعبة؟"
• رد التاني: "لأ طبعاً .. ماعنديش الكود اللي بيفتحها"
• الأول: "هو لازم؟"
• التاني: "ما هو الأول على العالم في أي حاجة بيكون فاتح الحاجة أو عامل هاكينج"!!!

أنا مصدوم وإن كنت غير مذهول!

للأسف دا فِكر الجيل اللي جاي فعلاً .. ودا مش ذنبه! .. دا طفل شايف أي رفاهية في حياته (ومعظمها لعب بلاي ستاشين وما يشبهها) .. كلها معتمدة على Hacking and cheats.

(اللي مش متابع الكلام دا أحب أوضحله إن دي حاجات بتخلي مثلاُ محارب في لعبة كمبيوتر مش بيموت .. أو بيشوف الأعداء من ورا الحيطة .. أو الرصاص بتاعه مش بيخلص .. فا يقدر يكسب أسهل وأسرع .. لأنه مش حايفضل يحاول ورا اللعبة لو ماخلصهاش في كام يوم عشان يجيب لعبة جديدة!)

المشكلة الأكبر إن دا مش بس في اللعب .. دا كمان في التربية .. غالباً الأهل كلهم بيشتغلوا .. مافيش وقت للأولاد .. فا أسهل حاجة إن أي حاجة يطلبها أو أي حاجة تخليه مشغول حانعملها عشان نعرف نستريح بعد يوم طويل مليان شغل وخناقات وسواقة وزحمة!

طب بلاش اللعب والفراغ .. ما هو أكيد الولاد بيعملوا حاجة مفيدة .. رياضة مثلاً .. صح؟

طب عندك وقت تودي ولادك يلعبوا رياضة أصلاً؟

بفرض إنك بتوديهم .. مواظبين تمام؟

طب اللي بيروحوا الفرق بقى والمنتخبات .. كلهم أحسن ناس فعلاً .. ولا اللي يعرف واسطة بيروح أسهل وضامن مكانه وبرضه مش لازم يتعب قوي؟!

طب بلاش رياضة .. الاجتهاد بيبان في المذاكرة والتفوق .. "لازم تذاكر عشان تنجح"

"عندك مدرسة الصبح"

"آه صح .. مش مهم المدرسة .. ما أنت بتاخد درس بالليل"!

يعني أكيد من الآخر فعلاً دا جيل أتعوّد على إن في وسيلة خلفية أسهل وأقصر للفوز! .. يعني التعب والمواظبة بصراحة مايأكلوش عيش!

طب المشكلة الأكبر .. لو واحد اتعود إن أي حاجة ليها وسيلة خلفية أسرع وأسهل للفوز .. هل لما يكبر ضميره حايكون صاحي قوي؟

الإجابة: مش شرط طبعاً نتوقع الضمير يموت بالسهولة دي .. بس مش صعب برضه نتخيل انه حايستسهل وياخد حاجة مش من حقه بحكم التعود!

في مشكلة أعظم كمان!

طب أنا حاقول بقى أنا أحسن من الناس دي .. أنا حاضغط على ابني عشان يبقى راجل .. حاعلمه إن شاء الله إن الفوز بتعب طعمه أحلى.

حافهمه معنى العمل والقوة والاحترام والوصول للمركز الأول بالطريق الصح .. مش حاسيبه يكون كسبان بالغش والطرق السهلة!

الله!!!! .. طب وهو يكسب ازاي أساساً إذا كان كل اللي حواليه بيغش!!!

مش قلتلكم مصيبة؟!

طب ليه الجيل دا بقى كده؟

جيل مظلوم .. احنا ظلمناه؟ .. مش قوي .. احنا اتظلمنا برضه بصراحة .. دايرة بتقفل علينا وبتخلينا نعيش بشكل مفروض علينا .. حتى لو احنا مش عايزين نبقى كده بنلاقينا بنعمله.

زي ما قال براد بيت في فيلم Fight Club:

“God damn it, an entire generation pumping gas, waiting tables; slaves with white collars. Advertising has us chasing cars and clothes, working jobs we hate so we can buy shit we don't need.”

ممكن نترجمه كالتالي:

"جيل كامل بيشتغل في أعمال كادحة وبيرضى بأي شغل عشان الدعاية بتخلينا نجيب سيارات وملابس والعمل في وظائف نكرهها لنشتري قاذورات لا نريدها!"

أنا موافق تماماً على إننا بقينا فعلاً عايشين في دوامة وبندوّر على حاجات المجتمع فرضها علينا .. مش حاجات احنا عايزينها!

مين بقى يقدر يكسر الدايرة دي؟

مين حاينزل يفسح ولاده بدل البلاي ستاشين ويحط في دماغه إن الاستمتاع أحلى من الراحة؟

مين حايلعب كورة؟

مين حايسمع الراديو بالليل بدل برامج ال talk show

مين حايتعلم حاجة جديدة بيحبها؟ .. على فكرة ممكن أي سن يشترك في السباحة مثلاً؟ .. يعني مافيش حاجة اسمها مافيش حاجة تتعمل! .. ممكن تروح الجيم .. ممكن تتعلم رسم .. تصوير .. مزيكا .. ممكن حتى وأنت كبير تبدأ تحفظ قرآن .. وممكن كمان فجأة تلاقي موهبة وتبقى الأول في مجالك وأنت عندك أربعين سنة .. مش لازم يعني مصر كلها تعمل MBA (مع احترامي لكل اللي عملها طبعاً وأنا عارف انها صعبة ومهمة ومفيدة .. قصدي بس ان في ناش مش محتجاها) .. ممكن تحضر ورشة لأي حاجة بتحبها .. وتكتشف إنك فاشل فيها فا تجرب حاجة تانية .. المهم ماتمشيش في الساقية وتجر ولادك فيها!

طب مين حايقول لولاده بلاش استسهال؟! .. بلاش تقليد! .. بلاش تحط في دماغك تعمل أي حاجة عشان تغلب صحابك! .. اعمل اللي يعجبك أنت حتى لو مش أشطر واحد فيه .. بس بمزاجك وبأسلوبك وبطريقة تخليك تسمتع وتحس بقيمة الحاجة دي!

صعب؟!

محمود فايز

26 مايو 2013

تابعوني على تويتر @mahmoud_a_fayez

www.mahmoudfayez.com